اوچ یولداش ...

بیر قادین ائودن چیخیردی کی ، قاپیدا اوچ قوجانین دایاندیغینی گؤردو . قادین : « سیزی تانیمیرام ، آنجاق حیس ائدیرم کی ، آجسینیز ، بلکه ، ائوه گله سینیز » ، - دئدی . قوجالار قادیندان حیات یولداشی نین ائوده اولوب - اولمادیغینی سوروشدولار . او دا ائوده هئچ کیمین اولمادیغینی دئدی . قوجالار : « ائله ایسه ، بیز سیزین ائوینیزه گیره بیلمریک » ، - دئدیلر ...

آخشام حیات یولداشی ائوه گلنده ، قادین ، احوالاتی اونا دانیشدی . یولداشی دا : « اونلارا ائوده اولدوغومو دئ ، قوی گلسینلر » ، - دئیه جاواب وئردی .

قادین قاپییا چیخدی و باییردا گؤزله ین قوجالاری ائوه دعوت ائتدی . آنجاق قوجالاردان بیری : « بیز بیر یئره دعوت ائدیلنده هامیمیز گئتمیریک » ، - دئدی . بو سؤز قادینی تعجوبلندیردی . اونون تعجوبلندییینی گؤرن قوجا : « بیز اوچ یولداشیق . بیریمیزین آدی وار-دؤولت ، بیریمیزینکی موفقیت ، او بیریمیزینکی سئوگی دیر ... ایندی گئت یولداشینلا مصلحتلش . هانسیمیزی دعوت ائتمک ایسته ییر سه ، قوی بیزه بیلدیرسین » ، - دئدی .

قادین ائوه گله رک هر شئیی حیات یولداشینا دانیشدی . یولداشی چوخ سئویندی و : « وار-دؤولتی دعوت ائدک ، قوی ائویمیز وار - دؤولتلی اولسون » ، - دئدی . قادین ایسه : « بلکه موفقیتی دعوت ائدک ؟ » - دئیه تکلیف ائتدی . بو واخت یان اوتاقدان اونلاری دینله ین قیزلاری نین سسی ائشیدیلدی . قیز : « سئوگینی دعوت ائتسک داها یاخشی اولار . اوندا ائویمیز سئوگی ایله دولار » ، - دئدی . حیات یولداشی : « منجه ، قیزیمیزین فیکری داها یاخشی دیر » ، - دئیه رک قادینا سئوگینی ائوه چاغیرماغی تاپشیردی . قادین قاپییا چیخدی و سئوگینی ائوه دعوت ائتدی . سئوگی قالخدی . ائوه یاخینلاشاندا او بیری دوستلاری دا اونون آرخاسینجا گلمه یه باشلادیلار . قادین تعجوبله : « من آنجاق سئوگینی دعوت ائتمیشدیم » ، - دئدی . سئوگی ایسه جاواب وئردی : « اگر سیز وار-دؤولتی و یا موفقیتی دعوت ائتسیدینیز ، اوندا ایکیمیز گلمه یه جکدیک . آنجاق سیز منی دعوت ائتدینیز . هارادا سئوگی وارسا ، اورادا وار-دؤولت ده ، موفقیت ده وار » ...